17 சபைகளள் – 4 லட்சத்து 86 ஆயிரத்து 423 வாக்காளர்கள்,
13 கட்சிகள் : 15 சுயேச்சைக் குழுக்கள்,
402 உறுப்பினர்களைத் தெரிவு செய்வதற்காக 4 ஆயிரத்து 111 பேர் களத்தில்
யாழ்ப்பாண நிர்வாக மாவட்டத்தில் உள்ள 17 உள்ளூராட்சி சபைகளுக்கு 402 உறுப்பினர்களைத் தெரிவு செய்வதற்காக 4 ஆயிரத்து 111 பேர் போட்டியிடுகிறார்கள் என யாழ்ப்பாண மாவட்ட உதவி தேர்தல் ஆணையாளர் இ.அமல்ராஜ் தெரிவித்தார்.
யாழ்ப்பாண தேர்தல் அலுவலகத்தில் இன்று ஊடகங்களுக்கு விளக்கமளிக்கும் போதே அவர் இவ்வாறு தெரிவித்தார்.
யாழ்ப்பாண நிர்வாக மாவட்டத்தில் உள்ள 17 உள்ளூராட்சி சபை களுக்கான தேர்தலில் இம்முறை போட்டியிடுகின்ற கட்சிகள் சுயேச்சை குழுக்கள் தங்களுடைய வேட்பு மனுக்களைத் தாக்கல் செய்துள்ள நிலையில், இம் முறை தேர்தலில் 13 அரசியல் கட்சிகளும் 15 சுயேச்சை குழுக்களும் யாழ் மாவட்டத்தில் போட்டியிடுகின்றன
13 அரசியல் கட்சிகளின் சார்பில் 135 வேட்புமனுக்களும் 15 சுயேச்சை குழுக்கள் சார்பில் 15 வேட்புமனுக்களுமாக 150 வேட்பு மனுக்கள் சமர்ப்பிக்கப்பட்டு தேர்தலுக்குரிய வேலைகள் ஆரம்பிக்கப்பட்டுள்ளன. இந்த முறை யாழ் மாவட்டத்தில் தேர்தலில் வாக்களிப்பதற்கு 4 லட்சத்து 86 ஆயிரத்து 423 வாக்காளர்கள் தகுதி பெற்றுள்ளனர். அவர்கள் வாக்களிப்பதற்காக 514 வாக்களிப்பு நிலையங்கள் ஏற்பாடு செய்யப்பட்டுள்ளன.
இம்முறை உள்ளுராட்சி சபைகள் சட்டத்துக்கு இணங்க அந்தந்த வட்டாரங்களிலே வாக்குகள் எண்ணப்பட்டு வட்டாரங்களுக்கான முடிவுகள் அறிவிக்கப்பட வேண்டிய நிலையில் உள்ளோம் அந்த வகையிலே 243 வாக்கு எணணும் நிலையங்கள் யாழ் மாவட்டம் முழுவதுமாக அமைக்கப்படவுள்ளன. அந்த 243 வாக்களிப்பு நிலையங்களில் வாக்குகள் எண்ணப்பட்டு வட்டாரத் தேர்தல் முடிவுகள் அறிவிக்கப்பட்டு பின்னர் மாவட்ட ரீதியாக முடிவுகள் அறிவிக்கப்படுவதற்கான ஏற்பாடுகள் செய்யப்பட்டுள்ளன.
யாழ்ப்பாண மாவட்டத்தில் உள்ள 17 உள்ளூராட்சி சபைகளுக்குமாக வட்டார அடிப்படையில் 243 உறுப்பினர்களும் கட்சிகள் பெற்றுக் கொள்கின்ற வாக்குகளின் அடிப்படையில் தெரிந்து அனுப்பப்பட வேண்டிய 159 வேட்பாளர்களுமாக 402 உறுப்பினர்கள் 17 சபைகளுக்கும் தெரிவு செய்யப்பட வேண்டியுள்ளது.
இந்த 402 உறுப்பினர்கள் தெரிவுக்காக யாழ்ப்பாண 13 கட்சிகளின் சார்பில் மூவாயிரத்து 686 வேட்பாளர்களும் 15 சுயேட்சை குழுக்களின் சார்பில் 425 வேட்பாளர்களுமாக 4 ஆயிரத்து 111 வேட்பாளர்கள் போட்டியிடுகிறார்கள் என்றார்.
