( மேலதிக படங்கள் இணைப்பு : படப்பிடிப்பு – ஐ. சிவசாந்தன்)
“வடக்கின் பெரும் போர்” என வர்ணிக்கப்படும் யாழ்ப்பாணம் மத்திய கல்லூரிக்கும், யாழ்ப்பாணம் பரியோவான் கல்லூரிக்கும் இடையிலான வருடாந்த துடுப்பாட்டப் போட்டியின் 116 ஆவது போட்டியில் யாழ்ப்பாணம் மத்திய கல்லூரி 9 விக்கெட்டுக்களால் வெற்றியீட்டியுள்ளது.
“வடக்கின் பெரும் போர்” யாழ்ப்பாணம் மத்திய கல்லூரி மைதானத்தில் நேற்று முன்தினம் 09 ஆம் திகதி வியாழக்கிழமை ஆரம்பமாகியது. 09,10,11 ஆம் திகதிகளில் – மூன்று நாட்கள் இரண்டு இனிங்ஸ்களாக இப் போட்டி நடைபெற்றது.
நாணயச் சுழற்சியில் வெற்றி பெற்ற பரியோவான் கல்லூரி முதலில் களத்தடுப்பைத் தெரிவு செய்தது.
அதன்படி, முதலில் துடுப்பெடுத்தாடிய மத்திய கல்லூரி அணி தனது முதல் இனிங்ஸிலே 66 ஓவர்கள் துடுப்பெடுத்தாடி, அனைத்து விக்கெட்டுகளையும் இழந்து 279 ஓட்டங்களைப் பெற்றுக் கொண்டது.
மத்திய கல்லூரி சார்பில் அதன் அணி வீரர்கள் அஜே 74 ஓட்டங்களையும், விதுஷன் 71 ஓட்டங்களையும் சன்சஜன் 42 ஓட்டங்களையும் பெற்றிருந்தனர்.
பந்துவீச்சில் பரியோவான் கல்லூரி சார்பில் அபிஷேக் 3 விக்கெட்டுகளையும், கஜகர்ணன், விதுஷன் ஆகியோர் தலா 2 விக்கெட்டுகளையும் வீழ்த்தியிருந்தனர்.
பதிலுக்கு தனது முதலாம் இனிங்சில் துடுப்பெடுத்தாடிய பரியோவான் கல்லூரி 51.2 ஓவர்களில் அனைத்து விக்கெட்டுக்களையும் இழந்து 127 ஓட்டங்களைப் பெற்றது.
துடுப்பாட்டத்தில், பரியோவான் கல்லூரி சார்பில் பென்சர் ஜெசியல் 43 ஓட்டங்களையும், சபேசன் 34 ஓட்டங்களையும் அதிகபட்சமாக பெற்றனர்.
பந்துவீச்சில் யாழ்ப்பாணம் மத்திய கல்லூரி சார்பில் நியூட்டன் 4 விக்கெட்டுக்களையும், கஜன் 3 விக்கெட்டுக்களையும் கைப்பற்றினர்.
153 ஓட்டங்கள் முன்னிலையில் இருந்த மத்திய கல்லூரி பலோன் முறையில் இரண்டாம் இனிங்சுக்காக முதலில் துடுப்பெடுத்தாடும் சந்தர்பத்தைப் பரியோவான் கல்லூரிக்கு வழங்கியது.
அதன்படி இரண்டாம் இனிங்சுக்காகத் துடுப்பெடுத்தாடிய பரியோவான் கல்லூரி 54 ஓவரில் சகல விக்கெட்டுக்களையும் இழந்து 160 ஓட்டங்களைப் பெற்றது.
துடுப்பாட்டத்தில் பரியோவான் கல்லூரி சார்பில் ஜனந்தன் 26 ஓட்டங்களையும், பென்சர் ஜெசியல் 25 ஓட்டங்களையும் அதிகபட்சமாகப் பெற்றுக் கொடுத்தனர்.
பந்துவீச்சில் மத்திய கல்லூரி சார்பில் பருதி 4 விக்கெட்டுக்களையும், நியூட்டன் 3 விக்கெட்டுகளையும் கைப்பற்றினர்.
9 ஓட்டங்களை வெற்றியிலக்காக கொண்டு பதிலளித்து துடுப்பெடுத்தாடிய யாழ்ப்பாணம் மத்திய கல்லூரி ஒரு விக்கட்டை இழந்து 9 வெற்றி பெற்றது.
